CEBU, Philippines – Duha ka balay ug ang barangay hall sa Ibo sa dakbayan sa Lapu-Lapu ang naugdaw sa sunog niadtong Lunes sa gabii nga nahimutang sa sitio Parola.
Matud ni Senior Fire Officer 1 Hadjiloden Samonte, imbestigador sa kabomberohan sa dakbayan, nag-overheat nga refrigerator ang hinungdan sa sunog.
Gikatahong nagsugod ang kalayo sa balay ni Jesus Jumao-as, job order employee sa siyudad sa Lapu-Lapu ug mikatap sa balay ni Edwin Tulod sakop sa Lapu-Lapu City Police Office, pasado alas 8 sa gabii. Ang maong mga balay nahimutang sa likod nga bahin sa barangay hall hinungdan nga naapil kini og kasunog.
Matud ni Samonte midako og maayo ang kalayo sa barangay hall tungod sa stocks nga binaldeng pintal nga iya sa siyudad. Ang sunog giisa ngadto sa 2nd alarm ug nakontrolar paglabay sa tulo ka minuto ug gideklarar nang fire-out sa alas 9:45 sa gabii. Si Samonte nagkanayon nga mokabat sa P450 mil ang danyos sa maong sunog. – /EIM) (BANAT NEWS)