CEBU, Philippines - Adunay balaudnon nga gipasaka didto sa Kongreso nga magmando nga ang mga kawani sa kagamhanan ug pribadong sektor hatagan gyud og 14th Month Pay.
Ang mipasaka sa balaudnon mao si Kongresista Rodrigo “Bebot” Abellanosa, representante sa Cebu City south district, nga nagtuong ang iyang lakang supakon gyud sa mga magpapatigayon.
Gipasabot ni Abellanosa nga nagkalisod na karon ang kahimtang sa mga mamumuo, kinahanglan nga hatagan sila og 14th Month Pay.
Ang Labor Code naglatid nga ang mga kawani makadawat lang og 13th Month Pay nga katumbas sa usa ka buwan nila nga sweldo ug kini ihatag kanila sa dili pa ang Pasko.
Matud ni Abellanosa nga kun ang House Bill 6239 hingpit nga maaprobahan isip balaod, maglatid kini nga ang 13th Month Pay ihatag sa Hunyo ug ang 14th Month Pay ihatag sa Disyembre.
Apan gusto sa mga magpapatigayon nga productivity-based incentive program ang ipatuman.
Matud ni Teresa Chan, presidente sa Cebu Chamber of Commerce and Industry (CCCI) nga ilang gyud kining supakon.
Nagtuo si Abellanosa nga makumbinsir niya ang mga kauban niyang magbabalaod sa Kongreso nga ipasar ang giduso niya nga balaudnon ug nga kahimoan kini og lakang sa Senado. (BANAT NEWS)