CEBU, Philippines – Gituohang buhi pa ang puya nga bag-ong gihimugso diha’ng kini gilabay sa sapa sa sitio Kalipay, Opao, dakbayan sa Mandaue.
Kini human nadunggan pa sa usa ka Norma Gerona ang hilak sa bata sayo kagahapon sa kadlawon nga una niya’ng gituohan nga iya sa iya’ng silingan.
Apan daku niya’ng kahikurat kagahapon sa sayo’ng buntag nga duna na’y bata nga naglutaw sa sapa nga wala na’y kinabuhi.
Sama ni Gerona, ang mga residente ug dili residente sa lugar nga nakakita sa kahimtang sa bata gibati sa tumang kalagot sa tawo nga responsable sa paglabay sa inosente’ng anghel.
Gikuha sa mga sakop sa Station 5 sa Mandaue City Police Office ang lawas sa bata nga gisulod na sa karton.
Kompleto na ang lawas sa bata nga usa ka babaye nga may labong nga buhok sa diha’ng gihiling sa kapolisan.
Matud ni Police Officer 1 Francisco Villaran, ang responder sa Station 5 sa MCPO, nga gisusi na nila karon kung kinsa ang responsable sa paglabay sa bata ngadto sa sapa. – /GMR) (BANAT NEWS)