CEBU, Philippines – Usa ka lalaki ang nakit-ang patay nga gidudahang nakuryentehan nga nagbuy-od diha sa Forbes Bridges sa Tupas Street, barangay Pasil ning dakbayan sa Sugbo.
Ang namatay mao si Warren Barbon, 25, taga sitio Lawis sa maong barangay.
Matud pa ni Senior Police Officer 2 Wetzel Berry, imbestigador sa Homicide Section sa Cebu City Police Office nga nahinabi sa Banat News nakit-an ang biktima duol sa usa ka construction site sa maong dapit. Sumala pa ni Berry adunay dakong paso sa dughan ang biktima nga gituohang inagian sa kuryente. Sa inisyal nga pagpangutana sa kapulisan sa nagdumala sa construction company kini mihimakak nga nagbutang sila og kuryente sa gawas o sa palibot sa ilang lugar ug wala sa’y live wire nga nakita ang kapulisan sa palibot.
Apan si Berry nagtuo nga posibleng gikan sa construction site ang kuryente nga gikamatyan sa biktima. Nagpadayon pa ang gihimo nga imbestigasyon sa kapulisan aron pagtino kun kinsay responsable sa kamatayon sa biktima. – /EIM) (BANAT NEWS)