CEBU, Philippines - Nisaka na ang presyo sa buwak nunot sa Kalag-kalag samtang ang mga kandila nagpabilin sa naandan nga presyo.
Matud sa pangulo sa Cebu City United Vendors Association (CCUVA) ug konsehal sa barangay Ermita, Maria Pino Buanghug, nga ang pagsaka sa presyo tungod sa kanihit sa supply.
Daghan usab order sa buwak alang sa Negros, Bohol ug ubang dapit sa nasud.
Si Rachelle Ricafrente, usa ka manindahay og buwak nisugyot nga aron makaminus, mopalit og arranged na daan sulod sa flower basket.
Dili mominus sa P400 ang daku nga na-arranged na daan ug ang gamay dili usab mominus sa P100.
Ang buwak nga Wonder tag P50 ngadto sa P70 ang pongpong, Lavander tag P60 ang dosena, Mums tag P160 ang dosena, Mums Tiger tag P160, Gladiola tag P120 ang puti ug P100 ang pink, Wonder White nga mao’y halinon tag P50 ang dosena, Golden Yellow tag P100, Wonder Yellow tag P100, Anthurium tag P100 ang dosena, P50 ang gagmay, medium tag P80 ug ang Tapay-Tapay tag P60 ang buok ug Orchid tag P50 ang dosena.
Ang kandila mapalit sa tag P25 ang gamay nga sulod sa baso, P60 ang dagku, ang colored nga kandila tag P70-75 ang buok, ang puti nga kandila tag P45 ang gagmay ug tag P75 ang dagku ug tag P110 ang labi’ng daku o mas gitawag nga kingkong candle.
Si Arnel Quijano, assistant market administrator, nagkanayon nga gisugdan ang pag-arrange sa mga manindahay nga kasamtangan karon gibutang sa dalan P. Lopez nga gihatagan og tag-upat ka lantay matag manindahay.
Dugang ni Quijano nga subli nila’ng i-monitor ang dapit ug kasamtangang wala’y leave ug day-off ang iya’ng mga market personnel ilabi na sa panahon sa pagdagsa sa mga mamalitay.
Temporaryo usab nga gisirad-an ang dalan P. Lopez sugod niadto’ng Miyerkules sa udto hangtud na sa Nobiyembre 2. (BANAT NEWS)