CEBU, Philippines – Ang Provincial Children and Women’s Commission (PCWC) nakig-coordinate na sa mga social workers alang sa pagtabang sa duha ka bata nga maoy nakasaksi diha nga ang duha ka dalagita giihaw sa ilang uyoan didto sa Carcar.
Si Heda Largo sa PCWC nagkanayon nga gikontak dayon nila ang mga social workers sa dakbayan sa Carcar aron katabangan ang mga bata ug mahatagan usab og tabang ang ginikanan niadtong mga dalagita nga gipangpatay.
Apan kabahin sa psychological ug medical examination sa duha ka bata’ng saksi nga nagpanuigon pa lang og dos ug kuwatro-anyos, ang City Social Worker sa Carcar nangayo og panabang niini ngadto sa PCWC.
Gibutyag ni Largo nga karong adlawa magtagbo sila sa mga social workers sa Carcar aron hisgotan kun unsay ilang ikatabang sa pamilya sa mga biktima. Ang mga bata anaa gihapon sa kostudiya sa ilang apohan.
Ang duha ka bata nakakita gayud diha nga ang magsuong 11-anyos ug ang 16-anyos nga dalagita gipangluglog ang ilang liog sa uyoan nila nga si Domingo Mangyao
Nagpakamatay ‘sab hinuon dayon si Domingo Mangyao human niya mapatay ang duha ka dalagita gamit ang hait kaayong sundang nga gipalit para unta iihaw og baboy atol sa “adlaw sa mga minatay.”
Samtang gilubong na kagahapon si Domingo Mangyao nga maoy mipatay sa duha ka dalagita niya nga pag-umangkon. Ang mga dalagita nga gipatay ilubong usab ugma’ng adlawa.
Si Ranulfo Mangyao nga amahan sa mga biktima nangayo’g tabang gikan sa kagamhanan aron mahipos ang patay’ng lawas sa iyang mga anak. – /RUB) (BANAT NEWS)