CEBU, Philippines – Gipaubos sa seminar ang kapolisan labot sa operasyon sa cyber pornography ug child exploitation. Si Bise Gobernador Agnes Magpale, vice chairman sa Provincial Council for the Welfare of Children (PCWC) ug Provincial Women’s Commission (PWC), nibutyag nga bag-o lang nahuman ang The First Responder’s Course Seminar kabahin sa cyber pornography.
Kini gipahigayon sa Department of Justice (DOJ) ug PWC niadto’ng Oktubre 19 hangtud 23.
Ang gipaubos sa seminar mao ang 17 ka polis kasagaran kanila mga opisyal, usa ka personnel sa National Bureau of Investigation (NBI) ug tulo ang gikan sa Kapitolyo.
Ang mga personnel nga napaubos sa seminar mao na ang motudlo sa uban nila’ng kauban o ipasa nila sa ila’ng mga kauban ang ilang mga nahibaw-an ug ngadto usab sa mga operatiba sa kalungsuran.
Gibutyag ni Magpale nga usa sa problema sa operasyon mao ang pagpreserba nila sa mga ebidensiya diin usa kini sa hinungdan nga mabasura ang kaso.
Karong tuiga tulo ka operasyon ang napahigayon sa mga lugar sa amihanan diin ang mga suspek pulos mga langyaw ug napasakaan na og kaso sa korte.
Apan usa sa mga problema mao nga ang mga ginikanan sa biktima kinsa kuwang sa suporta nga mapadayon gyud ang kaso batok sa mga suspek.
Giingong adunay ginikanan usab nga mao pa ang niunay og baligya sa ila’ng anak ngadto sa langyaw. – /GMR) (BANAT NEWS)