CEBU, Philippines – Ang tanang senior citizens dinhi sa dakbayan sa Sugbo nga rehistrado sa Office of the Senior Citizens Affairs (OSCA) hatagan na usab og tag P2 mil nga cash assistance atol sa birthday ni Mayor Michael Rama karong Miyerkules.
Si City Treasurer Diwa Cuevas mitug-an nga ang iyang opisina nag-andam na sa payroll nga gamiton sa pagpang-apud-apod sa cash assistance ngadto sa mga senior citizens. Ang dakbayan sa Sugbo mogasto na usab og P120 milyones aron ipanghatag sa mga senior citizens. Kun mahatag na kanila ang P2 mil, ang dakbayan kuwang na lang og P3 mil ngadto sa matag senior citizens nga ihatag unya sa Desiyembre.
Apan may mga senior citizens g’yud nga nangandoy nga hutdan na lang sila paghatag sa kinatibuk-ang kantidad nga ilang cash assistance karong tuiga nga P12 mil kada usa. Samtang si OSCA chief Domingo Chaves miingon nga dili na sila manawat pa og mga senior citizens nga mibalhin sa pagparehestro dinhi sa dakbayan sa Sugbo.
Nabantayan sa OSCA nga daghang senior citizens gikan sa ubang mga dapit mibalhin sa pagparehestro sa dakbayan sa Sugbo aron sila makadawat og daghang benepisyo.
Gibutyag usab ni Treasurer Cuevas nga wala pa siya masayod kun kanus-a ipanghatag ang nahabiling tag P2 mil nga cash assistance ngadto sa mga Persons with Disabilities (PWD). (/RUB) (BANAT NEWS)