CEBU, Philippines - Nagplano ang kagamhanan sa probinsiya sa Sugbo sa paghatag og hinabang sa mga lugar sa Northern Luzon nga gikusokuso sa bagyo’ng Lando.
Si Ethel Natera, public information officer sa Kapitolyo, nibutyag nga kagahapon sa buntag nagkaestorya sila sa hepe sa Provincial Disaster Risk Reduction Management Office (PDRRMO) nga si Baltazar Tribunalo diin gihisgutan nila ang mao’ng plano.
Si Tribunalo makig-estorya pa kang Gobernador Hilario Davide III aron masabutan kung unsa’y posible’ng mahatag nga tabang sa probinsiya ngadto sa Northern Luzon nga naapektuhan sa bagyo.
Matud ni Natera nga i-assess usab nila kung unsa’y maabot o kapasidad sa probinsiya nga tabang.
Lakip sa susihon kung unsa ang gikinahanglan sa mga biktima.
Base sa report kapin sa 200 ka lugar sa Central Luzon ug Tuguegarao City ang gibahaan pag-ayo.
Samtang base sa weather bulletin sa PAGASA nga gi-isyu kagahapon sa alas 5:00 sa hapon, ang bagyo nihinay na ug nahimo na lang nga low pressure area (LPA) nga gilaumang magdala og mahinay ngadto sa kasarangang mga pag-uwan, panugdog ug kilat sa Ilocos Region, Cordillera Administrative Region (CAR) ug Cagayan Valley.
Ang mga mananagat gipahimangnoan gihapon nga dili molawig sa kadagatan sa northern seaboard sa Northern Luzon.
Kagahapon sa hapon gilibkas na ang public storm warning signals.
Alas 4:00 sa hapon kagahapon, ang sentro sa LPA gibana-bana’ng nahimutang sa 120 km (kilometer) sa habagatang sidlakan sa Basco, Batanes. (BANAT NEWS)