CEBU, Philippines – Gidunggab sa iya’ng kaduwa sa dama ang usa ka lalaki human nga gipasanginlan nga nanikas sa ila’ng duwa pasado alas 6 sa Sabado sa gabii sa sitio Pasalero, Cawayan, Dalaguete.
Ang nadunggaban mao si Cris Vincent Dy, 24, samtang ang nakadunggab mao si Ireneo Duran, 41, silingan sa biktima.
Si PO3 Jehaziel Huyo-a, desk officer sa Dalaguete Police Station, niingon nga sa wala pa mahitabo ang pagpanunggab nagkuyog pa ang duha og suroy sa usa ka barangay nga nagpiyesta.
Apan sa ila’ng pagbalik nagduwa sila og dama ug nagkalalisay sila human nga nagtuo ang suspek nga gitikasan siya sa biktima.
Dugang ni Huyo-a nga gipakaon ka usa sa biktima ang suspek ug nabawsan siya og kaon makatulo ug nagduda siya nga gitikasan siya.
Nagkalalis ang duha apan si Duran nikuha sa iya’ng dala nga buwang ug nidunggab sa wala’ng abaga ug liog sa biktima ug dayong sibat.
Ang biktima nakit-an sa iya’ng mga kaliwat ug dali’ng gidala sa Dr. Ildefonso Alcantara Memorial Hospital aron matambalan.
Hinuon sa hot pursuit operation nasikop ang suspek ug gitanggong na sa karsel sa Dalaguete Police Station.
Gihulat pa hinuon sa kapolisan kun mopasaka ba og kaso ang biktima nga nagpaalim pa sa tambalanan. - /GMR) (BANAT NEWS)