CEBU, Philippines – Gilungkab sa wala mailhi’ng tawo ang tindahan sa usa ka negosyante sulod sa merkado sa sitio Sangi, Madridejos sa Alegria sa niagi’ng kadlawon. Ang tindahan gipanag-iya ni Garven Divinagracia, 38, molupyo sa mao’ng dapit.
Base sa imbestigasyon sa kapolisan nga ang usa sa empleyado sa biktima nga si Antonio Candido, 38, nitrabaho pasado alas 7 sa sayo’ng buntag sa niagi’ng adlaw.
Nagkuha siya og silhig ug nagsugod sa iya’ng adlaw-adlaw nga buhatonon sa paglimpyo sa dili pa mangabli ang tindahan.
Apan diha’ng naabot na siya og panilhig dapit sa pultahan sa tindahan nakabantay siya og usa ka screw nga naa sa sawog hinungdan nga iya’ng gisusi ang lock sa tindahan.
Mao’y iya’ng nakit-an nga naguba na ang kandaduhanan hinungdan nga nitaho dayun siya sa iya’ng amo nga mao’y nitawag sa kapolisan.
Nasuta sa imbestigasyon nga didto niagi ang kawatan sa pultahan ug gikuha niini ang P10 mil nga sinsiyo nga tag P5 ug P10 lakip sab sa gikuha ang pito ka pakete nga gatas, bino, brandy, flashlight, ug emergency light.
Nagtuo ang mga imbestigador nga kadlawon gibuhat sa kawatan ang paglungkab sanglit wala’y nakabantay niini.
Apan gisusi karon sa kapolisan ang mao’ng hitabo lakip na sab nga gikuha nila ang mga finger prints sa kandado ug sa sulod aron mailhan kun kinsa man ang nilungkab. - /GMR) (BANAT NEWS)