CEBU, Philippines – Naminghoy ang usa ka ginang human ang kwarta para esweldo sa iya’ng trabahante ug enrolment sa iya’ng anak ang gikawat sa wala mailhi’ng kawatan sa ila’ng establesemento sa J and M Building sa San Isidro, dakbayan sa Talisay niadto’ng Biyernes sa kadlawon.
Nisumbong sa kapolisan si Rhea Antonette Gallego, 45, minyo nga taga Peaceville Subdivision sa mao’ng barangay ug tag-iya og manpower agency. Si SPO1 Yvonne Ilustrisimo sa Talisay City Police nagkanayon nga nabantayan sa biktima nga ang ila’ng opisina abli na ug ang mga lock niini nangaguba.
Ang iya’ng cabinet ug drawer nangaguba na sab ug ang iya’ng kwarta nga mokantidad og P180,000 lakip ang iya’ng ariyos nga mobalor sa P5,000 ang nahanaw na sa gibutangan niini.
Asoy pa sa biktima nga iya unta kadto ipang-sweldo sa iya’ng empleyado ang kwarta ug ipa-enrol sa iya’ng anak apan tungod sa panghitabo naproblema na si Gallego.
Si Ilustrisimo niingon nga adunay duha ka tawo ang nag-picture-picture sa ila’ng opisina pipila ka adlaw sa wala pa mahitabo ang pagpanglungkab.
Nagduda sila ni Gallego nga giplanuhan gyud sila sa wala mailhi’ng kawatan. Ang opisina wala’y CCTV camera nga gimuntar. (BANAT NEWS)