CEBU, Philippines – Subli’ng mosalmot sa politika ang taga media nga si Roliveth “Boyet” Cortes human siya niduso sa certificate of candidacy sa pagka-gobernador nga usa ka independente sama sa iya’ng gihimo niadto’ng 2013.
Matud ni Cortes nga nakita niya ang daku’ng panginahanglanon nga bag–ong leader nga modala sa Sugbu sa sakto’ng direction ilabi na ang kasamtangang administrasyon wala makahatud sa nag-una’ng panginahanglanon sa probinsya.
Giklaro ni Cortes nga wala siya nahadlok sa mga high profile ang iya’ng makaatbang nga sila si kanhi GSIS president, Atty. Winston Garcia, ug si Gobernador Hilario Davide III nga usa sab ka abogado.
Matud ni Cortes nga dili magdaug sa educational background kun dili sa plata porma de gobiyerno.
Si Cortes naila sa iya’ng programa sa radyo ug telebisyon tungod sa pag-promote sa pamuhi og mga hayop lakip na ang manok igtatari.
Wala sab nabalaka si Cortes nga dala ang iya’ng ngan isip usa ka promoter sa sabong o derby gumikan kay ang sabong usa kini ka tradisyon sa mga Pilipino.
Nakatabang usab kini sa paglambo sa ekonomiya sa nasud tungod kay ubay-ubay nga manok pang-derby ang i-transport tungod sa kamahiligon sa mga Pinoy niini.
Naglaum si Cortes nga niini’ng ikaduha niya’ng pagpapili nga modaug na siya sanglit wala siya’y kontrobersya nga sama sa iya’ng kaatbang. (BANAT NEWS)