CEBU, Philippines – Malaumon ang Liberal Party (LP) nga mopatigbabaw ang ilang senatorial lineup sa umaabot nga 2016 elections nga gilangkoban og mga beterano ug mga bagito apan nadugay na sa panerbisyo sa publiko.
Si House Speaker Feliciano Belmonte, kinsa maoy campaign manager sa LP mihulagway sa ilang lineup nga "dynamic Filipinos" nga dili mopakyas sa mga Filipino.
"It is our hope that they sweep the Senate elections in 2016," matud pang Belmonte kinsa mao usab ang vice president sa partido sa report sa PhilStar.Com.
"With Mar and Leni, we are ready. We are willing and able to have a good fight in the 2016 elections," dugang pa ni Senate President Franklin Drilon, kinsa usa usab sa mga kandidato sa LP sa pagka senador. Lakip sa lineup mao sila si incumbent Sens. Teofisto Guingona ug Ralph Recto, kanhi Sens. Francis Pangilinan ug Panfilo ‘Ping’ Lacson, ug PhilHealth Director Risa Hontiveros nga matawag nang mga beterano.
Samtang ang mga bagito naggikan sa kabinete ni Aquino ug appointees nga sila si outgoing Justice Secretary Leila De Lima, kanhi Energy Secretary Jericho Petilla, ni-resign nga Technical Education and Skills Development Authority Director General Joel Villanueva, ug Tourism Infrastructure and Enterprise Zone Authority general manager Mark Lapid.
Ang kinabag-ohan kanila mao sila si Nariman Ambolodto nga interior assistant secretary for Muslim affairs nga usa ka magtutudlo ug kanhi acting governor sa Maguindanao ug si Coop Natcco Party-list Rep. Cresente Paez.
Sumala pa ni Drilon, si Ambolodto naggikan sa kabus nga pamilya ug nagdako siya sa mga evacuation camps tungod sa giyera didto sa Mindanao, matud pa ni Drilon, kinahanglang adunay susama ni Ambolodto nga mabutang sa senado. Si Pres. Benigno Aquino III masaligon nga pinaagi sa maong lineup masubay gihapon ang Pilipinas sa “Daang Matuwid." (Gikan sa Wires/EIM)