CEBU, Philippines – Wala pa kaayo maghuot ang mga buhatan sa Comelec dinhi sa Sugbo sa unang adlaw sa filing of certificates of candidacies kagahapon.
Sa Comelec sa probinsya sa Sugbo, nisang-at na sa iyang kandidatora si kanhi board member Maria Victoria “Tata” Corominas pagka-board member sa ikatulong distrito.
Si Corominas maoy chief of staff ni Bokal Celestino “Tining” Martinez, III apan kini miklaro nga miuyon niini si Tining. Si Corominas napiling board member niadtong 2004 hangtud sa tuig 2010. Gipasabot ni Corominas nga nagsugod siya isip independente ug karon gipili na usab niya nga independente aron direkta ngadto sa katawhan ang iyang accountability o dili na siya mag-agad pa og partido.
Samtang si Cesar Albor nga usa ka kolumnista ug magsisibya sa DyRC miduso sa iyang COC kagahapon sa buntag apan wala dawata sa Comelec tungod kay kuwangan kini sa iyang litrato o ID picture.
Si Cesar Albor mokandidato kini isip board member sa unang distrito ubos sa One Cebu Party. Ang konsehal sa lungsod sa Ginatilan nga si Maria Fema Duterte ang miadto usab kagahapon sa buhatan sa Comelec sa probinsiya aron pagpangayo og kopya sa COC kay nagtinguha usab kini mokandidato sa pagka-board member sa ikapitong distrito.
Sikyu mokandidato
Dinhi sa Cebu City, unang niduso sa kandidatora sa pagka-konsehal sa South District ang usa ka Romeo Capangpangan. Si Capangpangan,68, kanhi kawani sa gobiyerno nga taga Sun Valley sa barangay Calamba.
Si Capangpangan modagan isip independenteng kandidato. Si Capangpangan nagka-classmate ni Atty. Marchel Sarno, North District election officer sa dakbayan, sa dihang nagtungha pa sila sa Law School.
Usa ka security guard nga nahimong balot vendor ug construction worker nga si Juan Arinaza maoy unang miduso og COC pagka-kongresista sa North District sa dakbayan.
Matud ni Arinaza, kun siya makadaog iyang ihatag kanila ni Mayor Michael Rama, kanhi mayor Tomas Osmeña ug Konsehal Margarita Osmeña ang iyang binuwang sweldo.
Kini tungod sa 16 ka tuig niya nga panerbisyo nga walay sweldo ug naanad na siya niini, ug andam usab siyang motabang sa mga kabus. Ikawalo na niya kining pagduso og kandidatora.
Toledo City
Samtang sa Toledo City, duha ka mga kandidato sa pagka konsehal sa siyudad ang niduso sa ilang COC isip mga independent candidates.
Sila mao si kanhi Toledo City Councilor Teresito Terry Largo ug usa ka Yen Apurado ang niduso sa ilang kandidatora.
Kuyog ang ilang mga supporters nga malinawon lang usab nga nagkatapok sa gawas nga bahin sa Comelec.
Mandaue City
Sa dakbayan sa Mandaue, usa ka Edgar del Castillo Cortes ang midagan pagka-konsehal sa siyudad isip independente.
Si Jacky Reuyan, assistant election officer sa maong dakbayan miingon nga ala 1 pasado na ang takna kagahapon sa hapon nadawat ang COC ni Cortes nga lumolupyo sa barangay Banilad.
Atol ning pagsulat sa balita, wala pay niduso og kandidatora sa dakbayan sa Lapu-Lapu ug sa dakbayan sa Talisay apan gilauman nga karong adlawa hangtud sa Biyernes magsunod na unya ang mga kandidatong moduso sa ilang kandidatura.
Hangyo sa Comelec
Ang mga election officers sa nagkadaiyang lokalidad mihangyo nang daan niadtong mga kandidato ilabi na kadtong sakop sa mga dagkong political parties nga dili magdala og daghang supporters sud sa ilang mga buhatan.
Kini aron malikayan nga maghuot ug magkagubot tungod sa panagribal sa ilang mga kandidato.
Subay usab niini, si Lionel Marco Castillano, Provincial Comelec officer nagkanayon nga ministerial ang filing sa COC. Apan ang mokandidato kinahanglan nga mo-comply sa formalities sa pagduso sa COC sama sa pagbutang og ID picture sa mokandidato diin ang size niini passport size.
Ang COC kinahanglan tarungon kini sa pag-fill-up, dunay pirma sa kandidato ug ginotaryohan ug dunay documentary stamp tax.
Matud ni Castillano nga kung wala ang maong mga rekisitos dili una nila dawaton ang COC sa kandidato.
Di ma-disqualify kun…
Apan ang Comelec dili kini makakwestiyon sa mga gipangsuwat sa kandidato diha sa iyang COC lakip na niini kung registered voter ba siya sa lugar diin siya mokandidato ug kung Filipino citizen ba kini gawas lamang kung adunay mopasaka og disqualification case batok sa maong kandidato.
Matud ni Castillano nga siya mismo ang modala sa mga kopya sa COC ngadto sa Comelec Manila.
Duha ka kopya sa COC sa matag kandidato ang dalhon ngadto sa Manila diin ang usa ka kopya ihatag kini ngadto sa Law Department ug ang usa ka kopya ihatag ngadto sa Election Record and Statistics Department (ERSD).
Ang Law Department maoy mo-review sa mga COC kung ang mga kandidato nakatuman ba sa mga rekisitos.
Dugang ni Castillano nga gilauman nilang sa duha ka adlaw sa dili pa matapos ang filing sa COC daghan na unya ang moanha sa ilang buhatan aron mosang-at sa ilang COC. - Rowena Capistrano, Sheriza Mae Uy, Romeo Limpangog, Raymond Abarcas, Gabriel Bonjoc ug Decemay Padilla/EIM) (BANAT NEWS)