Circumferential road sa Malapascua sementuhon

CEBU, Philippines – Ang isla sa Malapascua sa Daanbantayan nga usa sa mga gidayo nga dive spot sa Sugbo makabaton na unya og circumferential road. Si Eng. Bobby Lim sa Provincial Engineering Office (PEO) mibutyag nga gisugdan na ang preparatory works sa pagsemento sa road curb.

Ang Socor Construction Corp. maoy nakadaog sa bidding sa P3.9 milyones nga proyekto sa barangay Logon, lungsod sa Daanbantayan.

Matud ni Lim nga ang five-kilometer circumferential road project component kini sa revised Malapascua Island Eco-Tourism Development Plan (MIEDP) nga gilagdaan ni Gobernador Hilario Davide, III sa milabay’ng tuig.

Ang kagamhanan sa probinsiya pasiunang mihatag og P5 milyones nga budget alang sa MIEDP.

Ang maong proyekto sa MIEDP naglakip kini sa construction sa multipurpose building ug development sa water supply ug hybrid power source.

Ang milabay’ng MIEDP nagama kini panahon ni kanhi gobernador Pablo Garcia niadtong tuig 2002.

Ang negosasyon sa road right of way sa circumferential road nagpadayon dihang ang iyang anak nga si kanhi gobernador Gwendolyn Garcia mao nay naglingkod kaniadto nga gobernador sa probinsiya.

Subay niini, ubos sa PEO project status monitoring mikabat sa P122 milyones ang mga infrastructure project ang nagama niining tuiga.

Uban sa maong proyekto gikatakdang mahuman sa dili pa matapos ang tuig 2015 o sayo sunod tuig gilangkuban kini sa mga karsada, school buildings ug water supply.

Ang contractor sa school buildings ug road projects gihatagan lang og 105-125 ka adlaw sa paghuman sa proyekto. - /EIM) (BANAT NEWS)