Mga kandidato sa BOPK gibutyag na
CEBU, Philippines – Gibutyag na ni kanhi mayor Tomas R. Osmeña ang kompleto nga line-up sa mga kandidato sa Bando Osmeña-Pundok Kauswagan (BOPK) sa dakbayan sa Sugbo sa 2016 elections.
Matud ni Osmeña nga ang tanang kandidato sa BOPK pormal nga ipresentar ugma human sila motambong og santos nga misa sa kapilya ni San Pedro Calungsod sa South Road Properties (SRP).
Si Osmeña ug Konsehal Nestor Archival ang mag-tandem sa pagdagan sa pagkamayor ug bise mayor. Ila’ng ikasangka sila si Mayor Michael Rama ug Bise Mayor Edgardo Labella nga magpasubli sa sama nga posisyon.
Ang mga kandidato sa BOPK sa pagka-konsehal sa south district mao sila si Margarita “Margot” Osmeña, Eugenio Gabuya Jr., Randy Navarro, Bonnel Balingit, Ann Marie Palomo, Danny Pacaña, Victor Buendia ug ang dramatorgo nga si Allan Nacorda nga naila sa angga nga Goliat sa DYHP.
Sa north district mao sila si Nida Cabrera, Sisinio Andales, Alvin Arcilla, Alvin Dizon, Mary Ann delos Santos, Joy Augustus Young, Malou Tabar ug Garry Lao, konsehal sa Barangay Tejero ug reporter sa The Freeman.
Si Rama nangangkon na nga pildehon nila ang tanang kandidato sa BOPK apan gikataw-an lang ni Osmeña. (BANAT NEWS)
- Latest
