CEBU, Philippines – Nagtinguha ang inila nga mag-aawit sa Sugbo nga si Maximo “Max” Surban nga magpapili sa pagka-konsehal sa North District sa dakbayan sa Sugbo.
Apan si Mayor Michael Rama buot unta nga himuon siyang consultant on Culture and Arts Commission ug malakip na usab sa Office of the Senior Citizens Association (OSCA).
Kini tungod kay nakompleto na ang line-up sa Team Rama ug dili buot ni Rama nga kuhaan ang iya’ng kandidato sa North District.
Matud ni Surban sa pagpakighinabi kang Rama nagguol ang mayor tungod kay wala siya nalakip sa line-up apan malipayon gihapon siya ug andam motabang sa pagpangampanya sa sakop sa Team Rama.
Tug-an ni Surban nga mas magguol si Rama kung sa pikas nga partido siya modapig.
Si Rama sa iya’ng bahin wala’y plano nga gub-on pa ang line-up nga iya’ng napresentar sa niagi’ng Domingo.
Si Bise Mayor Edgardo Labella gihapon ang modagan isip bise mayor sa bag-o nga ngalan sa Team Rama nga Partido Panaghiusa sa Panerbisyo –Tungod sa Gugma-Team Rama-United Nationalist Alliance (PPP-TG-TR-UNA). – /GMR) (BANAT NEWS)