CEBU, Philippines – Ang provincial legal officer, nga si Atty. Orvi Ortega nagplano nga mokandidato isip provincial board sa sunod tuig nga eleksiyon.
Matud ni Ortega nga posibleng modagan siya isip independente apan makig-estorya una siya ngadto kang Gob. Hilario Davide III kabahin sa iyang plano.
Matud usab niya nga kung modayon gyud siya sa pagkandidato sa sunod tuig nga eleksiyon mag-independente gyud siya tungod kay si Kongresista Willy Caminero sa ikaduhang distrito mipili kang Mayor Raymond Calderon sa lungsod sa Samboan nga mokandidato isip board member sa ikaduhang distrito ubos sa Liberal Party.
Ug giingong gawas kang Calderon dunay lain pa nga gipili si Caminero nga taga lungsod sa Dalaguete.
Gibutyag ni Ortega nga niadtong tuig 2001 napili siyang board member sa ikaduhang distrito sa probinsiya.
Ubos lang siya sa usa ka termino sa maong posisyon tungod kay niadtong 2004 midagan siya isip kongresista sa nahisgutang distrito apan napildi siya ni kanhi Kongresista Simeon Kintanar kinsa usa usab ka Argaoanon.
“The desire to serve is always there, ganahan man gyud ta moalagad but I have to talk with the governor and the party, I cannot isolate my desire, my pleasure to serve as an elected official with sa akoang concern sa governor, I am always looking at the concern ni gov. ug ni vice gov.,” ni Ortega pa. – /EIM) (BANAT NEWS)