CEBU, Philippines – Mapasalamaton ang Department of Environment and Natural Resources sa kusog nga uwan sa niagi’ng gabii hinungdan sa pagkahanaw sa gabon.
Gikatakda ugma nga mopagawas ang DENR sa resulta sa ila’ng air quality monitoring aron pagsuta kung ang nasinati nga gabon makadaut ba sa panglawas. Una’ng gidudahan nga ang gabon gikan sa sunog sa Sumatra, Indonesia.
Gitug-an ni Cyndylyn Pepito, pangulo sa Pollution Division Office sa Environmental Management Bureau-7 nga atol sa ila’ng pagpahimutang sa equipment nakasinati siya og pagpanakit sa tutunlan.
Apan iya’ng tambag nga dili dayun maghunahuna og bati ug paabuton una ang resulta.
Dugang ni Pepito nga ang nasinati magsilbi’ng pahinumdum sa publiko nga dili lang ang gabon ang angay nga bantayan apan lakip na ang ubang air pollutions sama sa aso nga gibuga sa mga sakyanan, factory, open burning ug ang pagpanigarilyo.
Gipaneguro sa ahensiya nga base sa ila’ng ulahi’ng quarterly report gikan sa Hulyo hangtud Septiyembre, fair to good ang air quality sa Metro Cebu. – /GMR) (BANAT NEWS)