CEBU, Philippines – Dul-an sa 80 ka pamilya nga kanhi namuyo sa danger zone sa Hagnaya, San Remigio nga benepisyaryo sa Caritas Village Community nga gihimo’ng pilot area sa proyekto sa Kwarta sa Basura.
Matud ni Fr. Charles Jayme, chairman sa rehabilitation sa Archdiocese of Cebu, nga nakig-alayon sila sa Mano-Mano Handicraft sa barangay Luz, dakbayan sa Sugbo isip maoy tigtudlo sa mga residente.
Sumala pa ni Jayme nga ang mga basura nga matigum sa mga residente gamiton nila aron makahimo og bag, rosaryohan, kwentas, ariyos ug uban pa. Dugang ni Jayme nga ila’ng gipalig-on ang mao’ng proyekto aron ang mga pamilya mao na usab ang motabang sa pipila ka pamilya nga biktima sa Yolanda aron aduna usab sila’y kapanginabuhian.
Si Jayme, nipadayag nga nakatabang usab sa matag pamilya ang ila’ng panginabuhian nga gikan sa basura.
Gipahibawo ni Jayme nga atol sa kalihukan sa International Eucharistic Congress nga ipahigayon sa Sugbo sunod tuig, gihatagan na sila og pagtugot ni Archbishop Jose Palma nga maka-display sa ila’ng mga baligya nga ginama gikan sa basura.
Gawas sa pag-display sa IEC, gilihok na usab karon sa grupo ni Jayme ang pagpahigayon sa pag-display sa mga gama sa mga pamilya gikan sa basura sa parokya sa Hagnaya ug sa showroom nga posible’ng ipahimutang sa Hagnaya Port nga padayon pa nila’ng giasikaso alang sa memorandum of agreement kauban ang lokal nga kagamhanan. – /GMR) (BANAT NEWS)