CEBU, Philippines – Pwerteng bun-oga sa usa ka babayeng ahente sa usa ka tindahan human siya gikulata sa usa ka Hapon nga iyang gibalibaran nga manulod sila sa usa ka motel diha sa barangay Lawaan 2, dakbayan sa Talisay niadtong Sabado sa gabii. Si Gretchen (tinuod pangan gipugngan sa Banat News), 34 anyos, taga barangay Bulacao ang nitawag sa iyang bana aron siya luwason gikan sa mga kamot sa Hapon nga si Shinobi Nogi.
Si Senior Police Officer 1 Mikie Espina sa Talisay City police nga nahinabi sa Banat News nitug-an nga nagkita si Gretchen ug ang Hapon sa barangay Tabunok aron hisgutan ang kabahin sa komisyon niini sa pagbaligya sa produkto sa langyaw.
Matud pa nga namugos ang Hapon pagsakay sa sakyanan sa biktima ug agi og respeto gitubayan kini sa babaye ug gisuroy samtang sila nagsige og estorya.
Apan matud pa paglabay nila sa may motel kalit gilubag sa Hapon ang manobela aron sila manulod sa maong establisamento.
Tungod niini, nihunong ang babaye ug misuway paglayat gawas sa sakyanan apan gipugngan sa suspek ug gisumbag, swerte na lang nga niduol dayon ang guwardiya maong nakaikyas ang babaye.
Ang biktima nitawag dayon sa iyang bana ug misumbong, samtang ang suspek gipugngan sa mga guwardiya ug gi-turnover ngadto sa kapolisan.
Gibutyag usab ni Espina nga dili na maayo ang relasyon sa magtiayon maong nasuod sa babaye ang maong Hapon, wa hinuon maklaro ni Espina kun duna bay relasyon ang Hapon ug ang babaye. – /EIM) (BANAT NEWS)