CEBU, Philippines - Nisiaw na sab ang pagpanulis, kawat ug lungkab sa dakbayan sa Talisay sulod sa niagi’ng mga adlaw.
Labing ulahi’ng biktima ang duha ka maestra ug manag-uyab.
Si Rosario Dioko, 42, usa ka maestro, ang nidangop sa kapolisan sa niagi’ng adlaw human ang iya’ng motorsiklo nga gi-parking dapit sa ila’ng opisina ang gikawat.
Ang iya’ng bayaw nga si Erwin Badajos, nga taga Dumlog ang nikuha niini ug giprenda ni Joselito Paculaba nga taga Tangke sa kantidad nga P8,200 apan nabawi sa kapolisan.
Si Roxanne Onopera, 28, nga usa sab ka maestra ang nipapriso sa usa ka Jason Sabando nga taga Alaska Mambaling, dakbayan sa Sugbo human nasakpi nga nilungkab sa panimaye niini.
Ang Samsung galaxy tab sa biktima nga kantidad og P12,000 ang gikuha apan narekober pinaagi sa tabang sa usa ka Julius Rex Tacatani nga nidakop sa suspek.
Samtang mga alas 2:00 sa kadlawon, gitulis ang manag-uyab human sa ila’ng date sa barangay Poblacion.
Duha ka tawo nga nagsakay og motorsiklo ang nition og hait nga hinagiban kang Argelly Ferraren, 20, taga San Isidro.
Matud niya nga samtang nagpaandar sa motor ang iya’ng uyab duha ka tawo ang nitulis kanila.
Tungod sa kahadlok, ila’ng gihatag ang kwarta ug cellphone nga mokantidad og P4,000.
Gani si Kapitan Teodoro Balo Belleza sa Poblacion ang nihulagway nga nigara ang mga kriminal sugod sa buwan sa Septiyembre diin 12 na ka pagpanulis ug pagpanglungkab ang ila’ng natala ug wala’y labot ang wala nagpa-blotter.
Ubang suspek nadakpan apan aduna’y pabiling gawasnon.
Si Supt. Germano Mallari, hepe sa kapolisan sa Talisay, nibutyag sa Banat News nga sa tulis, ila na’ng gisubay kung kinsa nga grupo nga motira bisan ginagmay.
Sa lungkab naa na sila’y nadakpan pero ang mga kauban nila mga menor de edad ang naa pa sa gawas kay dili pwede prisohon base sa lagda sa balaud.
Samtang nahanaw ang mahalon nga mga butang ug salapi sa usa ka panimalay sa sitio Young Life, Cogon, lungsod sa Compostela human kini lungkaba alas 10 pasado sa niagi’ng gabii.
Si Senior Police Officer 3 Pedro Enriquez niila sa panimalay nga gilungkab nga gipanag-iya ni Fe Terado, 40-anyos.
Sumala sa biktima nga nahinanok sila sa pagpangatulog sulod sa lawak ug ang kawatan didto agi sa luyo pinaagi sa pagguba sa gitabon nga lawanit sa giayo nga air-conditioning unit.
Dugang ni Enriquez nga nalakip sa nahanaw ang Lenovo tablet nga P20,000 ang kantidad, Samsung cellphone ug salapi nga mokabat sa P5,000 ang kantidad niini. (BANAT NEWS)