CEBU, Philippines – Nasikop ang unom ka tawo ug mokabat sa kapin P500 mil nga kantidad sa gituohang shabu ang nasakmit sa managlahi’ng operasyon sa kapolisan sa probinsya sa Sugbo sa nakalabay nga adlaw.
Sa lungsod sa Consolacion, usa ka 37-anyos nga lalaki nga gidudahang tigpahuyot og drugas ang nadakpan atol sa buy-bust operation sa barangay Tugbongan pasado alas 11 sa nakalabay nga gabii.
Ang nadakpan mao si Rolando Monsanto, ulitawo nga nagpuyo sa mao’ng dapit.
Gipangulohan ni Senior Insp. Wilson Abot, hepe sa Consolacion Police, P200 nga buy-bust money ang gigamit sa pagpalit sa usa ka gamay nga pakete sa gituohang shabu hinungdan sa pagkasikop sa suspek. Narekober pa ang laing 12 ka gagmay nga pakete ug duha ka medium-size sa shabu gikan sa suspek nga mikantidad og P118,000.
Samtang sa dakbayan sa Danao, upat ka tawo ang nadakpan human nasakpan nga nag-pot session sa barangay Poblacion pasado alas 11 sa nakalabay nga buntag.
Naabot sa mao’ng dapit ang kapolisan human sila nakadawat og tawag nga adunay mga tawo nga nagduwa og hantak. Apan sa pagsubay sa kapolisan, ila’ng nabantayan sa tulda-tulda ang mga tawo nga nagtapok ug nag-pot session. Nadakpan mao sila si Florencio Abellana, 42; Joseph Otero, 30; Raymond Donaire, 25 ug Mark Gotano, 20.
Sa lungsod sa Liloan, kapin sa P200 mil nga shabu ang nasakmit gikan sa 60-anyos nga lolo atol sa buy-bust operation sa barangay Tayud pasado alas 12 sa nakalabay nga hapon. Ang dinakpan giila nga si Jose Garcia Jr., alyas Joe, minyo nga taga Busay, dakbayan sa Sugbo.
Upat ka dagku’ng putos ug usa ka medium-size sa gidudahang shabu ang nasakmit gikan ni Garcia nga nagkantidad og P259,000. – /GMR) (BANAT NEWS)