CEBU, Philippines - Simbahan Romano Katoliko dili moendorsar og mga politiko atol sa eleksyon tungod kay girespeto nila ang katungod sa katawhan nga maoy mopili sa tawo nga gusto nilang ibutang sa pwesto.
Kini maoy gibutyag ni Fr. Roberto Ebisa, General Manager sa DyRF/ Power nga maoy pinasidunggan nga dinapit sa 40th Quarterly Meeting En Banc, Cebu Citizens Press Council.
Matud pa ni Fr. Ebisa, ang simbahan kinahanglang kutob lang sa political issues ug dili partisan politics ang pakiglambigit ngadto sa gobiyerno.
Sumala pa ni Ebisa, ang partisan politics dili maoy gisangyaw sa simbahan, ang buot sa simbahan nga tabangan ang katawhan aron makapili sila og hustong kandidato subay sa gidiktar sa ilang konsensya.
Apan ang tigpamaba sa Archdiocese of Cebu Msgr. Joseph Tan nga nahinabi sa Banat News nibutyag nga dili sila makaendosar og politiko tungod kay dili kinaiya sa simbahan nga gawngan ang mga botante kinsa ilang pilion.
Si Tan, nipadayag nga ang simbahan kutob ra gayud sa pagdasig sa katawhan nga mopili sa mga ligdong nga kandidato nga tinud-anay nga moalagad. Sumala pa ni Tan, ang simbahan dili makagamit sa iyang kaugalingon nga impluwensya aron pugson ang katawhan.
"We value the freedom and especially the freedom of choice," matud pa ni Tan. (BANAT NEWS)