CEBU, Philippines - Pormal nang nipadangat og suwat reklamo ang grupo sa mga mananagat sa Sugbu ang Guardian of the Seas Foundation ngadto kang Senador Francis “Chiz” Escudero isip maoy chairman sa Senate Environment and Natural Resources Committee.
Gihangyo nila ang senador nga maghimo og imbestigasyon sa padayong operasyon sa ilegal nga panagat nga nigamit og Hulbot-Hulbot sa amihanang bahin sa Sugbu.
Si Loy Anthony Cambal Madrigal, founder sa grupo ug kanhi hepe sa Cebu Provincial Anti Illegal Fishing Task Force maoy nipadala sa maong suwat ug niklaro nga niadto pang Oktubre 15, 2013 gi-ban ang Hulbot Hulbot.
Apan iyang gibutyag nga adunay duha ka mga fishing boats nga ilang gidakop sa kadagatan sa Sta. Fe niadtong Agosto 26, 2105 ug nasuta nga wa silay mga dokumento aron managat.
Matud niya ilang gi- turnover sa coast guard ug kapulisan sa Sta Fe , apan wala kini gikustodiya.
Gusto sa ilang grupo nga paimbestigahan ug makasohan sa Ombudsman ang mga sakop sa Coast Guard, Philippine Navy, Maritime Police, ug PNP sa Isla sa Bantayan.
Gani ni request usab ang grupo ni Madrigal ngadto sa Provincial Board ubos sa committee on environment nga imbestigahon ang Provincial Anti Illegal Fishing Task Force tungod sa pagpabaya niini sa ilang trabaho pagsumpo sa nag hitak na nga illegal fishing sa kadagatan sa lalawigan.
Apan una nang giklaro ni Atty. Chad Estella ang task force nga seryoso ang Kapitolyo sa paggukod niini. Gani adunay mga speed boats ang nakaestambay aron mogukod sa mga mananagat nga nigamit og ilegal nga pamaagi. (BANAT NEWS)