CEBU, Philippines – Gikompirmar sa Department of Justice (DOJ) nga nadakpan ang wanted nga magsuong sila si kanhi Palawan governor Joel Reyes ug kanhi Coron mayor Mario Reyes didto sa usa ka resort sa Phuket, Thailand sumala pa sa report sa Interaksyon.com.
Ang duha parehong nag-atubang og kasong murder human sila maoy gitumbok nga utok sa pagpatay sa environmentalist ug broadcast journalist nga si Gerry Ortega sa Palawan niadtong Enero 24, 2011.
Matud pa ni DOJ Secretary Leila de Lima, gipahibalo siya sa Bureau of Immigration (BI) nga ang magsuong Reyes gidakop sa Thai police tungod sa overstaying ug hayan ipa-deport balik sa Pilipinas.
Ang magsuong Reyes gituohang nakagawas sa Pilipinas niadtong Marso 2012 human nipagawas og warrant of arrest ang Palawan Regional Trial Court (RTC) batok kanila may labot sa kamatayon ni Ortega.
Ang gobiyerno adunay tag P2-milyones nga patong sa mga ulo sa magsuon ug giapil sila sa listahan sa mga high-profile nga pugante sa nasud.
Ang duha nailhan human nadakpan ang gunman nga si Marlon Recamata ug mitumbok sa nagkadaiyang mga personalidad apil na ang magsuong Reyes ug ang usa ka Rodolfo "Bumar" Edrad.
Si Ortega, gipatay sa Puerto Princesa, Palawan niadtong Enero 24, 2011. (Gikan sa Wires/EIM)