CEBU, Philippines – Drayber og pedicab naghubog ug nagpakamatay tungod kay giaway siya sa iyang kapuyo didto sa dakbayan sa Danao kaniadtong Sabado sa gabii.
Si Jade Flores Sescon, 26-anyos, patay na nga napalgan sulod sa iyang panimalay didto sa dalan Juan Luna, Barangay Poblacion, Danao.
Matud ni PO3 Nelson Pantoja sa Danao Police Station nga gitug-anan sila ni Emelita Wagong, ang kapuyo sa namatay, nga nagkalalis sila si Sescon kaniadtong Sabado sa buntag. Si Wagong miingon nga ang iyang kapuyo nakig-inom kini sa iyang mga barkada ug hubog na nga mipauli sa balay. Si Sescon milahos pagsulod sa kuwarto ug wala na mogawas sa panihapon. Sumala pa ni PO3 Pantoja nga nahibulong si Wagong nga ang iyang kapuyo wala na g’yud mogawas mao nga iyang gisusi ug nakurat na lang siya kay nagbitay na kini sa pisi. Nagtuo ang kapolisan nga ang panaglalis sa magtiayon maoy hinungdan nga si Sescon nakahuna-huna sa paghikog. – /RUB) (BANAT NEWS)