CEBU, Philippines – Nanghinaot si Mayor Michael Rama nga dili sagolan og politika ang pagsulbad sa problema sa luna nga ubos sa 93-1 Ordinance sa probinsya sa Sugbo. Matud ni Rama nga dili na kinahanglan nga usbon ang desisyon sa probinsya nga maoy ilang nasabotan atol sa meeting kauban sila Gobernador Hilario Davide, Vice Governor Agnes Magpale, kanhi gobernador Vicente Dela Serna, Vice Mayor Edgardo Labella ug Division of Welfare for Urban Poor (DWUP) Head Atty. Collin Rosell.
Nauyonan nila nga mobayad ang siyudad og P100 milyones isip initial nga bayad sa nahabilin nga P500 milyones nga kantidad sa luna nga nahimutang sa 11 ka barangay sa dakbayan.
Dugang pa ni Rama nga dili na angay mabalaka sa pagbayad tungod adunay kwarta ang siyudad alang niini.
Niadtong giselebrar ang ika-137th adlaw nga natawhan ni kanhi presidente Sergio Osmeña, namahayag ang apo niini nga si kanhi mayor Tomas Osmeña nga kun siya makadaog pag-usab pagkamayor sa siyudad iyang gipasalig nga sulbaron ang problema sa 93-1 Ordinance.
Kaniadto buot sa probinsya sa Sugbo nga makigbaylo sa siyudad sa yuta sa South Road Properties isip bayad sa luna nga ubos sa 93-1 apan wala
Nanghinaot usab si Rama nga mamahimo kini nga malampuson ang pagsulbad sa problema sa 93-1.
Sa laing bahin, ang kagamhanan sa probinsiya gikatakdang mopadangat og suwat ngadto kang Rama kabahin sa isyu sa 93-1 nga lote. Ang maong lote nga gipanag-iya sa probinsiya nahimutang kini sa dakbayan sa Sugbo ug gipuy-an na sa mga tawo.
Si Bise Gobernador Agnes Magpale mibutyag nga niadtong Biyernes duna silay gipahigayong workshop sa pagsulbad sa isyu sa 93-1 ug aduna na silay nakab-ot nga desisyon.
Niining ulahi lang ang kagamhanan sa Sugbo mipadangat kini og draft sa Memorandum of Agreement (MOA) kabahin sa ilang tanyag sa 93-1.
Apan ang maong draft sa MOA gitimbang-timbang usab kini sa kagamhanan sa probinsiya apan gipahibalo nang daan ni Magpale nga adunay mga kausaban sa MOA nga giduso sa dakbayan tungod kay ang probinsiya aduna say mga kondisyon. – /EIM) (BANAT NEWS)