Eco-tourism sa Midwest Cebu palambuon

CEBU, Philippines - Giawhag sa kagamhanan sa probinsiya sa Sugbo ang mga lokal nga opisyal sa midwest nga una sila mopahigayon og tourism activity palambuon una nila ang ila’ng lugar.

Ang midwest gilangkuban sa mga lungsod sa Aloguinsan, Pinamungajan, dakbayan sa Toledo, Balamban, Asturias, Tuburan ug Tabuelan.

Si Bise Gobernador Agnes Magpale nagkanayon nga ang mga opisyal sa lugar kinahanglang mohimo og kalihukan alang sa pagpauswag sa ila’ng lugar.

Upat ka adlaw nga training ug workshop kabahin sa community-based ecotourism ang gipahigayun sa mao’ng mga lugar niadto’ng Septiyembre 7 hangtud 10.

Si Magpale nibutyag nga ang Bojo River Cruise sa Aloguinsan mao lang ang malampuson nga community-based ecotourism ug buot nila kini’ng i-replicate sa ubang lungsod.

Si Gobernador Hilario Davide III sa iya’ng bahin nagkanayon nga daghan ang nangangkon nga ang Cebu ang premier tourist magnet apan ang tourist arrivals sa Cebu nisaka lang kini og 40 porsiyento sa tuig 2008 hangtud 2012.

Si Joselito Costas, Capitol consultant for ecotourism, nagkanayon nga nag-focus sila karon sa midwest tungod kay minus ang tourism activity sa lugar.

Matud ni Costas nga sa iya’ng pagsuroy sa mga lugar sa midwest iya’ng nasuta nga adunay mga potential ecotourism sites nga wala ma-develop.

Lakip niini ang crash site ni kanhi Presidente Ramon Magsaysay sa Mount Manunggal sa Balamban ug ang Batawang River sa Tabuelan.

Sa Aloguinsan makita usab ang mga dolphins samtang sa Pinamungajan adunay waterfalls ug sandbar ug sa Toledo adunay daku’ng man-made lake nga gipalibutan og mga bukid.

Sa Tuburan adunay Molo-Bolo Spring ug Marmol cliff ug sa Asturias adunay wetland ecosystem nga Lake Buswang.  (BANAT NEWS)