CEBU, Philippines - Tungod sa nakitang dakong problema sa trapiko sa Sugbo sa umaabot nga panahon, nitumaw karon ang sugyot pagbutang og cable cars aron mamenusan ang mga sakyanang kinahanglang moarangkada sa kadalanan.
"If Cebu will speed up, then yes," matud pang Norbert Feuerstein sa Doppelmayr kinsa maoy tagdumala sa maong kompanya sa Asya-Pasipiko.
Si Feuerstein nagkanayon nga adunay daghang mga nasud nga adunay cable cars isip matang sa transportasyon ilabi na sa ilang mga kabus nga mga molupyo.
Ang ilang kompanya maoy nagtukod sa cable cars sa La Paz, sa nasud sa Bolivia nga adunay gilay-on nga napulo ka kilometro nga adunay tulo ka kable nga gikumbitayan og 443 ka cable cars.
Sumala pa niya, ang cable cars didto sa La Paz makahatud og 162 mil ka pasahero kada adlaw gikan sa alas-8 sa buntag hangtud sa alas-10 sa gabii.
"In La Paz, Bolivia for example, cable car is the mode of transportation among poor people. Fare is only about P30.00 (50% discount for students, senior citizens and disabled) for a 10 kilometer travel and a travel time of only 30 minutes," matud pang Feurstein.
Si Paul Villarete, tsirman sa organizing committee sa 11th International Conference of Eastern Asia Society for Transportation Studies nagkanayon nga gituki nila karon ang posibilidad nga pagbutang og cable cars system nga magkonektar sa Mactan padung sa mainland Cebu.
Si Feuerstein nagkanayon nga dili lisod ang pagbutang niini sa maong lugar ug dako kini kaayo og matabang sa pagmenus sa trapiko.
Si Villarete nagkanayon nga ang planong pagbutang og cable cars dinhi unang nahunahunaan ni kaniadto Cebu City Mayor Tomas Osmeña niadtong tuig 2001.
Apan tungod sa kay way pundo ug way interesado nga mogasto alang sa katukoran niini wa kini masugdi og plano.
Gituohan nga dili pa andam ang mga Sugboanon pagdawat niini nga bag-ong matang sa transportasyon niadtong panahona.
Apan matud pang Villarete, kinahanglang di mohunong ang Sugbo pagpangita og labing maayong matang sa transportasyon ug ang cable cars dili angay balewalaon kay wa kinahanglana.
Hinuon kinahanglan pang tun-an ug mohimo og mga konsultasyon bahin niini.
Samtang si Arturo Bartiquin, Doppelmayr consultant dinhi sa Pilipinas nagkanayon nga dako kaayo ang matabang sa cable cars kay makamenus kini sa trapiko ug daghan na unya ang di na ganahang mosakay og mga sakyanan. (BANAT NEWS)