Taga HPG-7 motabang sa trapik sa Manila
CEBU, Philippines - Moabag ang Highway Patrol Group-7 sa mga polis nga gipakatap sa kaulohan alang sa pagpahapsay sa trapiko ilabi na sa EDSA o Epifanio delos Santos Avenue.
Kini ang gitug-an ni Chief Insp. Oliver Plania sa HPG-7 human kini nakadawat og text message gikan sa HPG-National Capital Region nga nanawagan sa nagkadaiya’ng rehiyon nga makatabang sa problema.
Sumala pa ni Plania nga sila si Senior Police Officer 3 Edwin Pineda ug Police Officer 1 Jonard Dagangan ang duha nga niboluntaryo nga madestino sa NCR nga mahimo’ng magmando sa dagan sa trapiko.
“This is not compulsory. It’s just voluntary. So this is just for those who are willing to be assigned in the NCR,” matud ni Plania kinsa nidugang nga si Pineda ug Dagangan ang adunay paryente sa Manila.
Hinuon si Plania nipasabot nga nagpaabot pa sila sa memorandum gikan sa Campo Crame alang sa mao’ng katuyoan.
Si Plania niingon nga si Pineda ug Dagangan ang lakip sa niserbisyo sa Asia-Pacific Economic Cooperation (APEC) Summit sa Sugbo.
Bisan pa man og adunay nagsingabot nga laing daku’ng kalihukan sa Sugbo nga mao ang International Eucharistic Congress, si Plania nidugang nga kinahanglan sab nila nga sanungon ang hangyo sa kaulohan kay nagkinahanglan sila og dugang sakop.
“Wala mahimo kay mas kinahanglanon ang tawo. Kinahanglan pud sila og assistance,” dugang ni Plania. (Jojo C. Ugdol/GMR)(BANAT NEWS)
- Latest
