CEBU, Philippines - Dugang unom ka mga kaso sa sakit nga dengue ang natala sa Brgy. Apas sulod lang niining bulana ug nasuta nga ang mga nasakit pulos naggikan sa usa lamang ka sitio.
Matud ni Ma. Kathleen Aya-ay, Head Nurse sa Barangay Health Center sa Apas nga naalarma sila sa panghitabo karon tungod mao kini ang unang higayon nga daghan ang nagkasakit og dengue sulod lamang sa usa ka buwan ug naggikan lang sa usa ka dapit.
Dugang pa ni Aya-ay nga ang labing daghan nga natala naggikan sa Sitio Baca diin upat ang nasakit ug sunod sa Sitio San Miguel diin duha ang natala, ang duha ka sitio managsilingan ra.
Ang barangay namutang karon og toxoim sa mga kurtina nga maoy sagad batogan sa lamok.
Sugod sa buwan sa Enero nikabat na og 18 ka mga kaso sa dengue ang natala sa ilang barangay, wala hinuoy namatay sa mga biktima.
Ang Brgy. Apas maoy ikaupat sa mga barangay sa North District sa dakbayan sa Sugbo nga adunay kinadaghanan og kaso sa dengue.
Samtang niadtong Hulyo nikabat na og 284 nga kaso sa dengue ang natala sa Cebu City sugod niadtong buwan sa Enero hangtod Hunyo 27 ,2015. (Sheriza Mae R. Uy/EIM)(BANAT NEWS)