CEBU, Philippines - Nangandam na usab karon ang dakbayan sa Mandaue sa subling pagbalik sa problema sa dagan sa trapiko karong nibalik na sa pagtrabaho ang mga kontraktor sa Deparment of Public Works and Highways (DPWH) sa wala pa mangahuman nga road projects diha sa siyudad.
Si Glenn Antigua nga maoy executive operation officer sa Traffic Enforcement Agency of Mandaue (TEAM) miangkon atol sa press conference kagahapon nga maghuot na usab unya ang kadalanan tungod niini.
Matud pa ni Antigua nga nabantayan nila dihang nagsugod pagtrabaho sa dalan Plaridel nahasol gyud ang mga motorista tungod kay sirado man ang usa ka lane niini.
Gipahunong ang pagtrabaho sa kadalanan nunot sa gipahigayong Asia-Pacific Economic Cooperation meetings sa Cebu City hinungdan nga gipaagian ang maong dalan.
Si Antigua miingon nga mangita na usab sila karon og alternatibong mga dalan aron maagian sa mga motorista.
Sa laing bahin, sa dakbayan sa Sugbo, si Cebu City Transportation Office chief Rey Gealon miingon nga wa silay planong magpatabang sa Highway Patrol Group pagdumala sa dagan sa trapiko sa dakbayan.
Matud pa niya, mga polis sa dakbayan mao ang gikinahanglan diha sa kadalanan aron pagbantay sa seguridad kay ang CCTO makadumala man sa trapiko. (BANAT NEWS)