CEBU, Philippines – Giawhag sa Kapitolyo ang mga mag-uuma ug mananagat sa kalungsuran sa pagpahimulos sa Agri-Fishery Insurance Program.
Ang hepe sa Provincial Agriculture Office, Dr. Roldan Saragena, niawhag sa pagduol sa ila’ng buhatan aron magpalista sa nahisgutang programa.
Ang premium sa insurance nga P35 bayran sa Kapitolyo pinaagi sa gahin nga P10 milyones karong tuiga.
Kinahanglan nga ang mag-uuma o mananagat sakop sa usa ka organisasyon nga giila sa munisipyo o siyudad.
Ang pangedaron sa pwede’ng ma-insured gikan sa 15-anyos ngadto sa 80-anyos.
Ang makuha nga benepisyo kung mamatay mao ang P57,000 nga langkuban sa P50,000 nga death benefit; P5,000 nga medical reimbursement ug P2,000 nga burial expenses.
Dugang ni Saragena nga sa nilabay’ng tuig, P6 milyones lang ang gigahin nga budget sa Kapitolyo alang sa Agri-Fishery Insurance Program ug karong tuiga nitugot si Gobernador Hilario Davide III nga himuon kini’ng P10 milyones. – /GMR) (BANAT NEWS)