Bata namatay kay gidagmalan sa mama?

CEBU, Philippines - Gisusi karon sa kapolisan ang pagkamatay sa usa ka tres-anyos nga bata kay posible nga kini gidagmalan sa iyang inahan.

Si PO3 Lou Pagara, imbestigador sa homicide section sa Cebu City Police Office (CCPO), miingon nga nakadawat sila og report nga ang bata usahay dapatan sa iyang inahan.

Matud ni Pagara nga aron pagwagtang sa mga pagduda, ilang ipa-autopsy ang bata. Nasayran sa mga polis nga usahay biya-biyaan lang sa iyang inahan ang bata sa ilang gipuy-an sa Barangay Sambag II.

Nahibaw-an sa kapolisan nga wala na’y amahan nga nag-atiman sa maong mga bata kay napriso samtang ang ilang inahan wala sa’y trabaho.

Si Pagara miingon nga ang mga silingan sa bata maoy midala kaniya sa tambalanan kay nakita nila nga nagsige kini’g suka ug wala diha ang iyang inahan.

Wala ‘sab hinuon ihiklin sa kapolisan ang posibilidad nga ang bata namatay sa kalibanga.

“Para mahibaw-an nato kun wala ba namatay sa bun-og ang bata ato na lang gipa-autopsy kay mao may ingon gud sa mga silingan nga dapatan daw kuno ang bata,” matud ni Pagara. (Jojo C. Ugdol/RUB)(BANAT NEWS)