Cultural center ipaayo sa Kapitolyo
CEBU, Philippines - Ipaayo sa kagamhanan sa probinsiya ang Cebu Cultural Center (CCC) sa Lahug, dakbayan sa Sugbo aron mapahimuslan.
Si Bokal Celestino Martinez III nagkanayun nga ang pasilidad himuon nga multi-purpose building diin ang mga Sugboanong artista pwede’ng makapahigayun og art exhibit ug ubang kalihukan.
Matud ni Martinez nga niadto’ng Miyerkules uban sa mga Sugboanon nga artista nibisita sa CCC nga wala na nagamit.
Ang pasilidad sama sa sinehan nga may kapasidad nga 1,000 ka lingkuranan.
Matud ni Martinez nga dili daku og ayuhon ug dili usab daku ang gastuhon sa pagpaayo niini.
Ang CCC adunay makobra nga P7 milyones nga insurance gikan sa Government Service Insurance System (GSIS).
Ang mao’ng kantidad igo nga magamit nga masugdan sa pagpaayo ang building ug ang Kapitolyo modugang kung magkuwang ang budget.
Gibutyag ni Martinez nga gisugdan na sa pagbuhat ni Provincial Engineer Hector Jamora ang plano sa pag-ayo sa building.
Dugang ni Martinez nga sulod niini’ng tuiga paningkamutan nila’ng masugdan ang pagpaayo sa building. (BANAT NEWS)
- Latest
