CEBU, Philippines – Nakalingkawas sa kamatayon ang usa ka tawo nga gipusil samtang nagbiseklita sa sitio Camoning, Poblacion, Carmen alas 11 pasado sa niagi’ng Lunes sa gabii.
Abtik nga nakalayat ug nihapa sa yuta dayung ligid sa pagtago sa usa ka panimalay ang biktima nga giila nga si Ruel Komaingking Bontia, 45, minyo ug wala’y trabaho nga nagpuyo sa mao’ng dapit.
Matud ni Senior Police Officer 2 Simplicio Gibo sa Carmen Police Station nga gikan sa lungsod ang biktima ug padulong na pauli sa ila’ng panimalay.
Paghidangat sa mao’ng dapit kalit lang gipusil sa wala hiilhi’ng lalaki nga gituohang nag-atang na daan.
Sa una’ng pagpusil naigo ang bukton sa biktima apan dali kini’ng nakalayat gikan sa iya’ng biseklita.
Matud ni Gibo nga giusban pa unta sa pagpusil ang biktima apan dali kini’ng nakatago sa luyo sa usa ka panimalay hinungdan nga ang nagpusil dali nga nibiya sa mao’ng dapit.
Ang biktima dali nga gidala sa Danao Provincial Hospital. – /GMR) (BANAT NEWS)