CEBU, Philippines – Usa ka amahan gipasakaan og kaso’ng kriminal sa hukmanan tungod sa pagdagmal sa iyang 13-anyos nga anak-dalagita kay dugay’ng mipauli gikan sa gitambongan nga disco.
Si Assistant Cebu City Prosecutor Maria Theresa Casiño miingon nga ang sinumbong usa ka construction worker ug nakalapas kini sa lagda nga gilatid sa Republic Act 7610, kon child abuse law.
Ang dalagita, (dili lang ibutyag ang ngalan), miingon nga gibunalan og angle bar ang tuo niya nga bitiis kaniadtong Agosto 23, usa ka adlaw human siya mitambong og disco.
Ang kamot, bukton ug lawas sa dalagita gibunalan ‘sab sa amahan. Ang dalagita miingon nga mikuha pa og sundang ang iyang amahan ug giingnan siya nga patyon na sa maong higayon.
Ang anak mipasangil nga ang iyang amahan mibunlot kaniya gawas sa panimalay ug buot unta siya lumsan sa baril nga adunay tubig. Aron nga dili siya malumsan, miyaka ang dalagita apan gibunlot siya sa iyang amahan.
Midagan ang anak aron unta magpalaban sa iyang inahan apan ang iyang papa mikuha’g dust pan ug misuway’g hapak kaniya.
Gusto sa dalagita nga mabilanggo ang iyang amahan. Ang kapolisan midakop sa amahan ug makagawas lang sa bilanggoan kun makabayad sa piyansa nga P80 mil. (BANAT NEWS)