CEBU, Philippines - Dili mominos P111 mil ang nakuha sa wala mailhing kawatan nga milungkab sa usa ka lending company sa dalan Tupaz, Brgy. Sawang Calero , dakbayan sa Sugbo niadtong milabay nga kaadlawon.
Ang kawatan nisakiyo sa cash nga P99, 030, duha ka tseke may kantidad nga P12,200 nga gikan sa OCS Lending Company Inc.
Si Police Officer 3 Joseph Victorioso sa San Nicolas Police Station nagkanayon nga ang pagpanglungkab posibleng nahitabo niadtong Huwebes sa hapon hangtud sa alas 5 sa buntag sa Biyernes.
Ang kawatan nakasulod pinaagi sa pagtangtang sa jalousie sa bintana ug giguba ang metal vault nga gisudlan sa maong mga kwarta ug pagkahuman yanong nigawas sa pultahan sa establisamento sa iyang pag-ikyas.
Nasayran nga walay closed-circuit television (CCTV) camera ug security guard ang mao nga establisemento, apan aduna silay nakuha nga mga finger prints sa crime scene.
Sa laing bahin, dul-an sa P50 mil nga mga gamit ang nasakiyo sa usa ka gidudahang kawatan apan gidemalas kay nailhan kay naabtan sa tag-iya sa balay diha sa Sitio Camagayan, Brgy. Perelos sa dakbayan sa Carcar.
Ang biktima naila nga si Maria Concepcion Marcia Bartoba Wamar, 49, samtang ang gitumbok nga suspek mao si Wilfredo Bongcawel alyas Timoy, 34, nga molupyo ra sa maong lugar.
Gikan sa iyang trabaho sa Mandaue City ang biktima ug nakugang na lang sa iyang pag-abot sa balay nga guba na iyang lock sa pultahan ug diha na sa sulod ang suspek apan dali kining nikaratel og dagan.
Sa iyang pagsusi sa iyang balay wala na ang iyang video camera, ariyos, kwentas, relo ug kwarta nga P600 ug ang tanan mobalor og dul-an sa P50 mil hinungdan nga midangop siya sa kapolisan, apan ang suspek wala na makita pa sa ilang balay.
Samtang gidakop sa iyang mga kaubang nagtrabaho sa tindahan ang usa ka kawani human kini nasakpang nangawat og kwarta ug mga butang pinaagi sa close circuit television camera sa iyang trabahoan.
Si Police Chief Inspector Genilo Veraque, hepe sa Presinto 3 sa Mandaue City Police Office (MCPO) miingon nga ang pagpangawat nahitabo alas 12 pasado ang takna sa hapon sa 7- Eleven Store sa Brgy. Labogon sa maong dakbayan.
Ang nadakpan giila nga mao si Orlando Mancao, 25, taga Upper Tabok, dakbayan sa Mandaue samtang ang nagdakop kaniya mao sila si Joavanie Pacquiao, 23, Rodolph Malazarte, 26, ug mga kauban niya sa trabaho sa maong taindahan. (BANAT NEWS)