CEBU, Philippines - Nag-ungot pa sa Monetary Board sa Land Bank of the Philippines ang P200 milyones nga utangon sa Kapitolyo aron ipamalit og heavy equipment.
Si Provincial Treasurer Emmanuel Guial nibutyag nga nagkinahanglan pa sa opinyon sa Monetary Board ang mao’ng loan aron ma-release.
Ang Kapitolyo magtubo og 3.75 porsiyento matag tuig sa mao’ng loan diin ang maong tubo “fix” nga nagpasabot nga kung motaas ang “foreign exchange fluctuation rate” dili motaas ang interest o tubo sa kwarta nga giutang.
Matud ni Guial nga ang kagamhanan sa probinsiya nigahin og P110 milyones nga debt servicing o bayad sa utang gikan sa 20 porsiyento nga development fund.
Si Guial nagkanayun nga buot sa gobernador nga sulod sa una’ng termino maimpas dayun og bayad ang utang.
Ang mao’ng loan mao’y ikaduha nga loan sa probinsiya sukad niadto’ng tuig 1991.
Ang LBP nihatag na og loan approval diin matud ni Guial nga pwede na sila’ng makapahigayun og bidding apan dili pa ma-award ngadto sa mga modaug nga bidder hangtud nga adunay opinyon gikan sa Monetary Board.
Ang LBP nihatag og P2.7 bilyones nga credit limit sa Kapitolyo. (Brenda D. Batuto/GMR)(BANAT NEWS)