CEBU, Philippines - Nasakmit ang armas de fuego ug linikit nga pinauga’ng dahon sa marijuana gikan sa usa ka habal-habal driver diha’ng nasigpatan sa kapolisan sa dalan H. Abellana, Cubacub, dakbayan sa Mandaue alas 10 pasado sa niagi’ng gabii. Si Police Officer 2 Ryan Diamada sa Presinto 6 sa Mandaue City Police Office niila sa nadakpan nga si Johnny Amit Maloloy-on, 21, taga Marfa, Bakilid.
Nagpahigayun og pagpatrolya ang kapolisan sa mao’ng dapit diha’ng ila’ng nasigpatan ang suspek nga nagmaneho sa habal-habal nga nagsiwil ang giluklok nga armas sa hawak. Dali’ng gisita ug gisakmit ang kalibre .22 nga wala’y lisensiya nga puno sa bala.
Atol sa pagrekisa, nasakmit usab ang usa ka stick sa pinauga’ng dahon sa marijuana gikan sa suspek. Ang suspek nagtingkagol na sa selda sa kapolisan ug gikatakda’ng pasakaan og kaso. (BANAT NEWS)