CEBU, Philippines - Duha ka tawo ang nabiktima sa pagpamusil sa managlahing dapit dinhi sa dakbayan sa Sugbo kagahapon sa kaadlawon. Patay ang usa ka dispatcher nga si Anecito Blanco Sr.,48, human kini gipusil sa baba ug nilapos sa luyo sa iyang ulo diha sa sulod sa iyang balay sa Skyview Park, Brgy. Busay ning dakbayan sa Sugbo.
Matud pa ni Police Officer 3 Lou Pagara, imbestigador sa Homicide Section niadtong tuig 2013 makaduha na ‘sab ka higayon gipusil didto sa Sibonga ang biktima apan nakalingkawas sa kamatayon maong nibalhin kini og puyo dinhi sa dakbayan sa Sugbo.
Samtang pasado alas 11 sa nakalabay sab nga buntag, patay na nga naabot sa Vicente Sotto Memorial Medical Center (VSMMC) ang 38-anyos nga si Joeniven Bendanillo, human kini gipusil sa lalaking nag-angkas sa usa ka motorsiklo diha sa Justice Street, Peace Valley, Brgy. Lahug ning dakbayan kagahapon sa buntag. (BANAT NEWS)