CEBU, Philippines – Gikasubo ni Cebu Archbishop Jose Palma ang sagunson nga nahitabong pagpamanhig dinhi sa Metro Cebu nga mikalas og kinabuhi sa mga biktima.
Matud ni Palma makapasubo ang ingon niini nga panghitabo tungod kay dili kini makahatag og kaayuhan ug dili makiangayon.
Sumala pa niya walay si bisan kinsa ang may katungod nga ibutang sa kaugalingong kamot ang balaod lakip na ang hustisya.
Naalarma si Palma sa maong panghitabo kay matud pa niya binuhatan sa dautan ug dili angay balewalaon. Nanghinaot siya nga mahatagan og hustisya ang mga biktima lakip na ang ilang mga pamilya. Base sa datos sa kapulisan, unom na ka mga pagpamusil sa Metro Cebu nga binuhatan sa riding in tandem sud lang sa usa ka buwan.
Niadtong Hulyo 14, gibanhigan patay ang usa ka negosyante og chicharon nga si Jaime Villaceran sa Osmeña Blvd. sa siyudad sa Sugbo.
Nasundan kini niadtong Agosto 2 gipusil ang polis nga si PO3 Ramon Bolongaita diha sa Brgy. Busay, Cebu City gikan misimba uban sa iyang pamilya, Agosto 5 ang kanhi police asset nga si Fitz Cobong ug ang babayeng negosyante nga si Lorna Lapinid gi-ambush sa dakbayan sa Talisay.
Agosto 13, tulo ka mga insidente sa pagpamusil ang nahitabo una didto sa dakbayan sa Lapu-Lapu diin gipamusil silang Barchie Fuentes ug Jason Rey Pusa, unya gibanhigan usab silang Atty. Amelie Alegre, Atty. Briccio Boholst ug Antonio Pino nga miresulta sa kamatayon ni Alegre usa ka semana na ang nakalabay didto sa dakbayan sa Mandaue.
Human sa maong hitabo, didto sa Barangay Tisa duha usab ang gipusil ug usa kanila ang namatay. – /EIM) (BANAT NEWS)