CEBU, Philippines – Naugom sa usa ka lalaki ang bala human kini gipusil sa iyang silingan diha sa Brgy. Looc, lungsod sa San Remigio, pipila ka oras human usab nakapusil ang suspek diha sa Brgy. Punta sa mao gihapong lungsod.
Ang biktima giila nga si Hubert Cabataña,32, samtang ang laing biktima mao si Lito Demecelio, 58, nga taga Bankal sa mao gihapong lungsod.
Si Police Officer 1 Cloyd Andales sa San Remegio Police Station miila sa suspek nga mao si Tirso Cerono Mandado, nagpuyo usab sa maong dapit.
Naigo sa tangkugo si Cabataña apan kutob lang sa baba ang bala. Matud pa nasuko ang suspek kay gibaraw ni Demecelio sa pag-antog sa hantak ang suspek ug kalit gipusil ang paa niini.
Human sa maong pagpamusil dali nga miikyas ang suspek apan nalabyan niini si Cabataña nga nag-inom ug gisunod sa pagpusil. – /EIM) (BANAT NEWS)