CEBU, Philippines - Nigradwar na sa Alternative Learning System (ALS) ang 15 ka piniriso sa Cebu Provincial Detention and Rehabilitation Center (CPDRC) kagahapon. Si Marco Toral, consultant sa CPDRC, nibutyag nga 12 sa mao’ng piniriso nakapasar sa high school ug tulo sa elementarya.
Apan usa sa mga nakapasar sa high school bag-o lang nadala ngadto sa National Bilibid Prison sa Muntinlupa ug wala na nakadawat sa diploma.
Kasagaran sa mao’ng mga piniriso nag-atubang og kaso’ng murder ug ginadili’ng drugas.
Ang ALS sa CPDRC nasugdan niadto’ng Enero 2014 ug ang nigradwar kagahapon ang una’ng batch. Kapin sa 100 ang nipaubos sa ALS apan 15 lang ang nakapasar sa validation.
Matud ni Toral nga pangitaan nila og paagi nga kadto’ng mga nipasar sa high school mapaubos sa mga training program sa TESDA kabahin sa panginabuhian. Ang CPDRC nagplano nga makigsabot sa TESDA sa mao’ng programa.
Dugang ni Toral nga kadto’ng mga piniriso nga nakapasar sa high school pwede na sab mopadayun sa pag-eskwela sa kolehiyo kung makagawas na sa prisohan o mahuman na ang ila’ng sentensiya. (BANAT NEWS)