CEBU, Philippines - Tukion pa sa Regional Tripartite Wages and Productivity Board ang gitinguha nga usbaw sa inadlaw nga suhulan sa mga mamumuo sa Central Visayas. Kini ang gibutyag ni Director Exequiel Sarcauga sa Department of Labor and Employment-7 kinsa mao’y chairman sa RTWPB-7.
Ang RTWPB kinahanglan usab mo-schedule og deliberasyon sa duha ka petisyon ug sa mga position papers nga giduso sa apektado’ng sector.
Sila si Metudio Belarmino Jr. sa Alliance of Progressive Labor (APL) ug Arturo Baritt sa Associated Labor Unions-Trade Union Congress of the Philippines (ALU-TUCP) ang niduso og lainlain nga petisyon.
Ang APL nagtinguha sa P92 nga usbaw sa minimum nga suhulan ngadto na sa P432 samtang ang ALU-TUCP niduso og P145 aron mahimo na nga P485 matag adlaw.
Nipresentar sa ila’ng position papers ang Confederation of the Philippine Exporters-Cebu; Hotels, Resorts, Restaurant Association of Cebu; Cebu Chamber of Commerce and Industry, Philippine Retailers Association, Siquijor Chamber of Commerce and Industry, Bohol Chamber of Commerce and Industry, ug Mandaue Chamber of Commerce and Industry. (BANAT NEWS)