CEBU, Philippines - Nasagmuyo si Cebu City Mayor Michael Rama sa gihimo sa mga residente palibot sa Doña Pepang Cemetery.
Kini human nitumaw ang kagubot niadto’ng Huwebes sa buntag atol sa pagpadayun sa demolisyon sa una’ng grupo sa kabalayan diin gilabay og hugaw sa tawo ang mga sakop sa Prevention, Restoration, Order, Beautification, Enhancement (PROBE) Team.
Matud ni Rama nga makig-estorya ug andam siya maminaw sa hangyo sa mga residente ug iya sab pasabton sa tumong sa proyekto sa siyudad.
Pipila ka mga residente nagkanayun nga andam sila nga mohawa sa lugar apan buot sila nga hatagan usa og klaro nga relokasyon.
Si Konsehal Alvin Dizon, pangulo sa committee on housing sa konseho sa dakbayan, nisugyot atol sa executive session niadto’ng Martes sa paghangyo ni Rama ug sa PROBE nga temporaryo nga ipahunong ang pagguba sa kabalayan samtang wala pa’y klaro ang relokasyon.
Nagkagubot niadto’ng Huwebes tungod kay dili pa mopahawa ang mga residente tungod kay wala pa’y kabalhinan
Si Rama nipasabot nga padayun ang pag-restore ug paghimo nga heritage park sa Doña Pepang Cemetery. (Sheriza Mae R. Uy/GMR)(BANAT NEWS)