CEBU, Philippines – Usa ang patay ug tulo ang grabe’ng naangol human nagsampakay ang duha ka motorsiklo sa Sitio Guingkan-an, Cagcagan, Poro pasado alas 9 sa nakalabay nga gabii.
Ang namatay naila nga si Angelito Rodriquez, 36, minyo, taga barangay Pagsa sa mao’ng lungsod samtang ang mga naangol sila si Jovert Dañosa, 14, drayber sa motorsiklo ug ang iya’ng duha ka back riders nga sila si Richard Garciano, 15 ug Alvin Borla, 14, pulos taga barangay Adela sa sama nga lungsod.
Gikan sa San Francisco proper ang motorsiklo nga gisakyan sa mga minor de edad paingon sa Poro ug kini nikawat og lugar hinungdan nga nipilit sa laing motorsiklo.
Gumikan sa kakusog sa bangga nanglupad sa motorsiklo ang mga biktima diin si Rodriquez ang nagrabehan nga nakaangkon og grabe’ng bun-og sa ulo.
Ang tulo ka mga minor ang dali sab nga gidala sa tambalanan sa dakbayan sa Sugbo human nakaangkon og grabe’ng bun-og sa kalawasan. – /GMR) (BANAT NEWS)