CEBU, Philippines - Patay ang usa ka bayot human kini gipusil sa agtang sa usa ka gunman diha sa Sitio Palsy, Brgy. Sambag 2 sa dakbayan sa Sugbo sa miaging gabii. Giila ang biktima nga si Felecisimo “Felipa” Jubay, taga Sitio Ibabao, Mactan lungsod sa Cordova.
Matud pa ni Police Officer 1 Reoful Adalim, imbestigador sa Homicide Section sa Cebu City Police Office nga nahinabi sa Banat News paingon na pauli ang biktima gikan sa iyang trabaho dihang nasugatan niini ang duha ka lalaking luwan sa usa ka motorsiklo ug ang angkas diretsong mipusil kaniya.
Ang biktima naigo sa agtang, suwang ug liog ug patay na pag-abot sa Vicente Sotto Memorial Medical Center (VSMMC).
Tulo ka basiyo sa bala sa .45 caliber pistol ang nakuha gikan sa crime scene nga gituohang gigamit sa kriminal. Gituohang dunay dakong kalagot ang killer ngadto sa biktima base sa paagi sa pagpatay niini. (Jojo C. Ugdol/EIM)(BANAT NEWS)